Qafqaz Müsəlmanları İdarəsinin konfrans zalında Ümummilli lider Heydər Əliyevin vəfatının 9-cu ildönümü ilə əlaqədar anım mərasimi keçirilib. Tədbir Qurani-Kərimdən ayələrin oxunması ilə başlayıb.

Mərasimdə giriş nitqi söyləyən Qafqaz Müsəlmanları İdarəsinin sədri Şeyxülislam Allahşükür Paşazadə Heydər Əliyevin dini baxışları, onunla bu mövzuda olan söhbətləri, həmçinin birgə Məkkə səfərindən olan xatirələrini bölüşdü. Allahşükür Paşazadə həzrətləri bildirdi ki, Azərbaycanda dindarlar əqidə azadlığını Heydər Əliyevin hakimiyyətə gəlişindən sonra hiss etməyə başlayıblar. "Heydər Əliyev ateist məfkurəsinə söykənən Sovet dövlətin rəhbərliyində təmsil olunduğu zamanda belə qəlbində Allaha olan inamını itirmədi, əksinə, İslamın tələblərinə imkan olduğu qədər riayət etməyə çalışdı", - Şeyxülislam vurğuladı. Sözünün davamında Şeyxülislam həzrətləri qeyd etdi ki, "Azərbaycanda sabitlik, inkişaf, birlik, vicdan azadlığı və tolerantlığın hökm sürməsi ulu öndər Heydər Əliyevin adı ilə bağlıdır. Bunlar Heydər Əliyevin müdrik siyasəti nəticəsində mümkün olub və bu siyasət Prezident İlham Əliyev tərəfindən uğurla davam etdirilir. Prezident İlham Əliyevin şəxsi diqqət və qayğısı ilə yeni məscidlər, məbədgahlar tikilir, dini abidələr təmir-bərpa olunaraq xalqımızın istifadəsinə verilir".

Qafqaz Müsəlmanları İdarəsinin sədri din-dövlət münasibətlərinin formalaşmasında xalqımızın Ümummilli lideri Heydər Əliyevin rolunu xüsusi vurğulayaraq bildirdi ki, Azərbaycan tolerantlığının ətrafında döndüyü mehvər məhz Heydər Əliyevdir. "İslam müsəlmanları birləşdirən bir amil olduğu kimi, Heydər Əliyev də Azərbaycanda təmsil olunan dinlərin birləşdirici amilidir. Dinindən asılı olmayaraq hər bir kəs onun qayğı və diqqətini üzərində hiss edirdi".

Öz çıxışında Yeni Azərbaycan Partiyasının sədr müavini, icra katibi Əli Əhmədov bildirdi ki, Heydər Əliyev islami dəyərlərə saf münasibəti olub və atdığı bütün addımlar da Azərbaycanda milli-dini mənəviyyatın inkişafına yönəlib: "Heydər Əliyev cəmiyyətin birləşdirilməsi, saflaşmasına böyük önəm verməklə yanaşı, mənəviyyatın inkişafına da xüsusi yer verirdi". Dini Qurumlarla İş üzrə Dövlət Komitəsinin sədri Elşad İsgəndərov bildirdi ki, hərcmərclik içində olan bir ölkədə heç bir mənəvi dəyərlərdən söhbət gedə bilməz. Azərbaycan həmin dövrdə Heydər Əliyev müstəqil dövlətin qorunması, dayanıqlı inkişafa yol açan addımlar atdı. Daha sonra natiq, Heydər Əliyevin dini mühitin inkişafı üçün gördüyü ciddi işlərə də diqqət yönəltdi. E. İsgəndərov Ulu öndərin hakimiyyəti dövründə Azərbaycanda ilk gənclər Forumunun təşkil olunmasını vurğulayaraq həmin görüş barədə xatirələrini qeyd etdi. "Gənclərin 200-dən artıq təklifinin dinləndiyi həmin Forumda Heydər Əliyev beş saat boyunca səbrlə və diqqətlə onları dinlədi. Yadımdadır, gənclərdən biri milli və dini adət-ənənələrimizə yad ünsürlərin xalqımızın əqidəsinə göstərdiyi mənfi təsirlərin qarşısının alınması barədə bir təklif irəli sürmüşdü. Həmin təklif həssaslıqla qarşılanmış və bu, dövlət-din siyasətində xüsusi diqqət yönəldilən məsələ olmuşdu".

Milli Məclisin deputatı Rəbiyyət Aslanova bildirdi ki, bu gün Heydər Əliyevin ruhu Azərbaycan xalqının daim yanındadır, onun adı tarixə qızıl həriflərlə yazılıb. R. Aslanova qeyd etdi ki, Azərbaycan bir çox sərvətlər ölkəsidir, ancaq onun əsas sərvəti insanlarıdır: "Azərbaycanın gələcəyi üçün çox işlər görən Heydər Əliyev onun müstəqilliyinin bünövrəsini 1993-cü ildə qoydu və müstəqil dövlət formalaşdırmağa başladı. Heydər Əliyevin fəaliyyətinin nəticəsinin bariz nümunəsi kimi bu gün Azərbaycandakı din-dövlət münasibətlərinin yüksək səviyyəsini göstərmək olar. Məhz onun fəaliyyəti sayəsində dini mühitdə bu qədər işlər görülüb". Sonra söz alan Azərbaycanda fəaliyyət göstərən Roma katolik kilsənin rəhbəri Vladimir Fekete Ulu öndərlə baş tutmuş yeganə görüşünün təəssüratlarını tədbir iştirakçıları ilə bölüşdü. Həmin görüşü heç vaxt unutmadığını bildirən natiq, bu gün də onun dəyər verdiyi keyfiyyətlərin Azərbaycanda uğurla yaşadığını nəzərə çatdırdı.

Dağ yəhudiləri icmasının sədri Melex Yevdayev öz çıxışında Heydər Əliyevin hər bir din mənsubuna olduğu kimi, Azərbaycanda yaşayan yəhudilərə də xüsusi diqqət və qayğısından söhbət açdı. On il bundan öncə nəşr edilən jurnalı tədbir iştirakçılarının diqqətinə çatdıran Melex Yevdayev Heydər Əliyevin jurnalın üz qabığında yer alan sözlərini bir daha xatırladaraq yəhudilərin Azərbaycanda asayiş və əmin-amanlıqda yaşadıqları nadir dövlətlərdən biri olduğunu vurğuladı. Bunun məhz, Heydər Əliyevin qurduğu Azərbaycan dövləti olduğunu nəzərə çatdırdı. Tədbir Qurani-Kərimin ayələrinin tilavətilə başa çatdı.

Tədbirdən sonra Qafqaz Müsəlmanları İdarəsinin mərasim zalında təbir iştirakçıları və dəvət olunmuş qonaqlar üçün ehsan süfrəsi açıldı. Təzəpir məscidində qılınan günorta namazından sonra dindarlara ehsan olaraq qurban əti paylandı.